DIOGELU PLANT A PHOBL IFANC

Côd Ymarfer Da
Argymhellwyd gan "Safe from Harm" y Swyddfa Gartref

1. Gweithredwch bolisi’r Eglwys yng Nghymru ar ddiogelu lles plant a phobl ifanc.
2. Cynlluniwch waith yr esgobaeth/plwyf fel bod cyn lleied o sefyllfaoedd lle gallai camdrin plant a phobl ifanc ddigwydd.
3. Cyflwynwch system sy’n caniatáu i blant a phobl ifanc siarad â pherson annibynnol.
4. Gwnewch yn siwr fod y gweithdrefnau cytunedig i warchod plant a phobl ifanc yn berthnasol i’r holl staff cyflogedig a gwirfoddol.
5. Rhowch ddyletswyddau penodol i’r holl staff cyflogedig a gwirfoddol.
6. Defnyddiwch oruchwyliaeth staff a gwirfoddolwyr fel modd i warchod plant a phobl ifanc.
7. Dylech drin bob ymgeisydd am waith sy’n golygu cyswllt â phlant a phobl ifanc yn yr un modd.
8. Ceisiwch gael o leiaf un geirda, gorau i gyd gan berson sydd â phrofiad o waith cyflogedig neu
   wirfoddol yr ymgeisydd gyda phlant a phobl ifanc, os yw wedi gwneud hynny.
9. Trafodwch holl brofiad yr ymgeiswyr o weithio neu gyswllt gyda phlant a phobl ifanc mewn
   cyfweliad cyn penodi.
10. Gwnewch ymholiadau i weld a oes gan ymgeisydd unrhyw gollfarn am droseddau yn erbyn plant neu bobl ifanc.
11. Gwnewch benodiadau cyflogedig a gwirfoddol yn amodol ar gwblhau cyfnod prawf yn
    llwyddiannus.
12. Cyhoeddwch ganllawiau ar sut i ymdrin â datgelu, amau neu ganfod camdrin.
13. Rhowch hyfforddiant i staff cyflogedig a gwirfoddol, eu cyd-lynwyr neu oruchwylwyr a llunwyr polisi, ar rwystro camdrin plant.

CYFLWYNIAD

Mae Plant a Phobl Ifanc yn rhan bwysig iawn o gymuned yr Eglwys yng Nghymru, i’w parchu a’u hanwylo er eu mwyn eu hunain. Wythnos ar ôl wythnos fe fydd plant yn ymweld ag adeiladau’r eglwys i addoli ac i chwarae. Mae hyn yn bosibl yn bennaf drwy wirfoddolwyr ymroddedig sy’n rhoi eu hamser a’u doniau i wasanaeth yr Eglwys.

Nid yw llunio’r canllaw hwn ar ymarfer da am awgrymu fod y rheiny sy’n ymwneud â gwaith cyflogedig neu wirfoddol gyda phlant a phobl ifanc yr Eglwys o dan amheuaeth. Mae’r Eglwys yng Nghymru yn awyddus i ddarparu amgylchfyd diogel a hapus lle gall plant a phobl ifanc dyfu a datblygu yn eu hymrwymiad Cristnogol.

Wrth ymateb i awydd yr Eglwys yng Nghymru i ddarparu’r amgylchfyd diogel a hapus hwn ac mae llawer ohonoch chi eisoes wedi mabwysiadu datganiad polisi ac wrthi’n hyrwyddo ymarfer da. Lluniwyd y canllaw hwn i’ch cynorthwyo chi i hyrwyddo gweithdrefnau gwell ar gyfer gweithio gyda phlant a phobl ifanc yn yr Eglwys yng Nghymru.

Fe fydd gweithredu’r argymhellion sydd yn y canllaw ymarfer da hwn yn rhoi i blant a phobl ifanc y gofal a’r amddiffyn y maent yn eu haeddu. Bydd yn rhoi sicrwydd i rieni a amddiffynwyr fod eu plant yn ddiogel wrth gymryd rhan yng ngweithgareddau’r Eglwys. Fe ddylai helpu i ddiogelu staff a gwirfoddolwyr rhag honiadau ar gam a all godi o gamddealltwriaeth; fe ddylai hefyd leihau’r perygl i’r Eglwys gael ei hunan yn atebol mewn ymgyfreitha sy’n codi o amgylchiadau o gamdrin.

Mae’r canllaw ymarfer da yn caniatáu rhywfaint o hyblygrwydd a’r gobaith yw y gellir, lle bo polisïau a gweithdrefnau eisoes wedi’u datblygu, eu haddasu er mwyn adlewyrchu’r manylion sydd yn y canllaw ymarfer da.

Gadewch i’r plant ddod ataf i a pheidiwch â’u rhwystro, oherwydd i rai fel hwy y mae teyrnas nefoedd yn perthyn.

Mathew Pennod 19 adn 14.

Rydyn ni, eich Esgobion, yn cymeradwyo i chi y gweithdrefnau sydd yn y canllaw ymarfer da.